Як жа прайшоў летнік з Францішкам-2025?
Гэта былі неверагодныя 6 дзён, напоўненыя радасцю, усмешкамі, весялосцю, духам еднасці і любові ў Хрысце. Нашыя рыцары з вялікім задавальненнем прыходзілі кожны дзень, бавілі час разам, маліліся, працавалі ў групках. Таксама дзеці намагаліся зарабіць як мага больш балаў для сваёй каманды, ахвотна праяўлялі ініцыятыву і крэатыўнасць у падрыхтоўцы рэквізітаў для выступу, прымалі актыўны ўдзел у розных спартыўных спаборніцтвах і эстафетах і проста стараліся быць добрымі хрысціянамі, дапамагаць бліжнім.
Асабліва прыкметна камандны дух выяўляўся падчас рэпетыцый да фінальнага канцэрту, які прайшоў у апошні дзень лагера. Дзеці пад кіраўніцтвам сваіх аніматараў павінны былі паставіць 3 нумары: песню, сцэнку і танец. Так, гэта здавалася амаль немагчымым– паспець падрыхтаваць такую праграму ўсяго за 5 дзён. Але, дзякуючы Божай дапамозе, у нас усё атрымалася. Кожная каманда прадставіла вельмі прыгожыя і крэатыўныя сцэнічныя нумары, ад якіх усе былі ў захапленні.
За час летніка мы сталі бліжэй адзін да аднаго, духоўна ўзраслі, навучыліся быць больш уважлівымі да сябра побач, бачыць у кожным чалавеку святло, клапаціцца пра дабро і згоду паміж намі, прабачаць. Спадзяюся, тое зерне, якое было ўкладзена ў сэрцы гэтых дзяцей, прарасце і прынясе плёны, умацуе іх веру.
"Таму не бойцеся: вартыя вы больш за многіх вераб’ёў. Так кожнага, хто вызнае Мяне перад людзьмі, і Я прызнаю перад Айцом Маім, які ў нябёсах." (Мц 10, 31-32)
Тэкст: Вікторыя Трот
Фота: Антон Савянок
