Вінагараднік аддасць іншым вінаградарам

Чарговы раз Езус скіроўвае сваю навуку да першасвятароў і старэйшын народа.

У цэнтры сённяшняга ўрыўка Евангелля - пытанне да слухачоў: ,,Што зробіць ён з гэтымі вінаградарамі?”, - і адказ Езуса: “злодзеяў гэтых пакарае ліхой смерцю, а вінаграднік аддасць іншым вінаградарам”.

Езус хоча сваёй навукай давесці слухачоў да асуджэння свайго граху, пакаяння і веры. У выніку супраціўлення словам Хрыста, гэтыя людзі дойдуць пазней да асуджэння Езуса на смерць. 

Каб слова Божае трапіла да сэрца і пачало дзейнічаць, добра дазволіць слову асудзіць як нас саміх, так і спосаб нашага жыцця. Не трэба гэтага суда баяцца, бо гэта суд міласэрнасці, а не прыніжэння чалавека.

бр. Юрый Краўчанка

ПЕРШАЕ ЧЫТАННЕ

Вінаграднік Пана Магуццяў — гэта дом Ізраэля

Чытанне кнігі прарока Ісаі.

Заспяваю прыяцелю майму 
песню сябра майго пра вінаграднік ягоны: 
Мой сябра меў вінаграднік 
на ўрадлівай гары. 
Ён ускапаў яго і ачысціў яго ад камення, 
і пасадзіў у ім адборную вінаградную лазу, 
і пабудаваў вежу пасярод яго, 
і давіла вычасаў у ім. 
Чакаў, што дасць ён гронкі вінаграду, 
але ён прынёс дзікія ягады. 
Дык цяпер, жыхары Ерузалема 
і мужы юдэйскія, 
рассудзіце мяне і вінаграднік мой. 
Што яшчэ я павінен быў зрабіць для вінаградніку майго
і не зрабіў для яго? 
Чаму я чакаў гронак вінаграду, 
а ён прынёс дзікія ягады? 
Цяпер я пакажу вам, 
што я зраблю з вінаграднікам маім: 
я прыбяру яго агароджу, і будзе спустошаны ён, 
знішчу сцяну яго, і ён будзе затаптаны. 
І прывяду яго ў запусценне: 
не будуць падразаць і ўскопваць яго, 
і зарасце ён цернем і пустазеллем, 
і забараню хмарам ліць на яго дождж. 
Вінаграднік Пана Магуццяў — гэта дом Ізраэля, 
а мужы юдэйскія — Яго ўмілаваныя саджанцы; 
Ён чакаў правасуддзя — і вось беззаконне; 
чакаў справядлівасці — і вось крык.

Гэта слова Божае.

ДРУГОЕ ЧЫТАННЕ

Тое чыніце, і Бог спакою будзе з вамі

Чытанне Паслання святога апостала Паўла да Філіпянаў.

Браты:

Ні пра што не турбуйцеся, але ў кожнай малітве і мальбе з удзячнасцю адкрывайце вашыя просьбы Богу. І спакой Божы, які пераўзыходзіць усялякі розум, будзе аберагаць сэрцы вашыя і думкі вашыя ў Хрысце Езусе. 

Нарэшце, браты, што ёсць праўдзівае, што годнае, што справядлівае,  што беззаганнае, што ласкавае, што хвалебнае, калі гэта нейкая цнота або нешта годнае пахвалы — пра гэта думайце. Чаму навучыліся, і што прынялі, і пачулі, і ўбачылі ўва мне, тое чыніце, і Бог спакою будзе з вамі. 

Гэта слова Божае.

ЕВАНГЕЛЛЕ

Вінагараднік аддасць іншым вінаградарам

+ Чытанне святога Евангелля паводле Мацвея.

У той час:

Езус сказаў першасвятарам і старэйшынам народа: Паслухайце іншую прыпавесць: Быў адзін гаспадар дому, які пасадзіў вінаграднік, абнёс яго агароджаю, вычасаў у ім давіла, пабудаваў вежу і, аддаўшы яго вінаградарам, адышоў. Калі ж наблізіўся час збіраць ураджай, ён паслаў слугаў сваіх да вінаградараў, каб забраць плады свае. А вінаградары, схапіўшы слугаў ягоных, аднаго пабілі, другога забілі, а іншага закідалі камянямі. Ён зноў паслаў яшчэ больш слугаў, і з імі ўчынілі тое самае. Урэшце ён паслаў да іх свайго сына, кажучы: Пасаромеюцца сына майго. Але вінаградары, убачыўшы сына ягонага, сказалі адзін аднаму: Гэта спадкаемца. Хадземце, заб’ём яго і завалодаем спадчынай ягонай. І, схапіўшы яго, выкінулі з вінаградніку і забілі. Калі ж прыйдзе гаспадар вінаградніку, што зробіць ён з гэтымі вінаградарамі? Кажуць Яму: Злодзеяў гэтых пакарае ліхою смерцю, а вінагараднік аддасць іншым вінаградарам, якія будуць аддаваць яму плады ў адпаведны час. Езус кажа ім: Няўжо ж вы ніколі не чыталі ў Пісаннях: Той камень, які адкінулі будаўнікі, стаўся галавою вугла; праз Пана гэта сталася і дзіўнае ў вачах нашых. 

Таму кажу вам, што адымецца ў вас Валадарства Божае і дадзена будзе народу, які прынясе плады яго.

Гэта слова Пана.

  Catholic.by

Папярэднія каментары можна прагледзець тут: Каментары